सोलापूर: जमिनीचा तुकडा आणि हाताशी खेळणारा पैसा माणसाला कोणत्या थराला नेऊ शकतो, याचा एक थरारक आणि अंगावर शहारे आणणारा प्रकार दक्षिण सोलापूर तालुक्यातील बोरामणी येथे घडला आहे. शुक्रवारी मध्यरात्रीच्या शांततेत, जेव्हा संपूर्ण गाव निद्राधीन होतं, तेव्हा एकाच कुटुंबातील तिघांचा रक्ताचा सडा पडला. ही कथा आहे एका अशा नराधम दिराची, ज्याने केवळ २५ लाख रुपये आणि जमिनीच्या वादातून आपल्याच भावजयीसह दोन निष्पाप पुतण्यांचा बळी घेतला.
शुक्रवारी (१ मे) मध्यरात्रीची वेळ. मस्के वस्तीवर सर्वजण गाढ झोपेत होते. गायत्री सुधाकर मस्के, त्यांची मुलगा शिवराज आणि मुलगी प्रियांका यांना कल्पनाही नव्हती की काळ त्यांच्या उशाशी येऊन उभा ठाकला आहे. आरोपी शंकर ऊर्फ पप्पू मस्के याने आपल्या साथीदारांसह घरात प्रवेश केला आणि हातातल्या धारदार तलवारीने झोपेत असलेल्या या तिघांवर सपासप वार करण्यास सुरुवात केली. काही क्षणांतच घराचा उंबरठा रक्ताने माखला आणि तिघांचाही जागीच अंत झाला.
या भीषण हत्याकांडाचा धागा ६ वर्षांपूर्वीच्या एका व्यवहाराशी जोडला गेला आहे. मयत गायत्री यांचे पती सुधाकर मस्के यांनी सहा वर्षांपूर्वी आपली शेतजमीन विकली होती. रक्ताच्या नात्यावर विश्वास ठेवून सुधाकर यांनी या विक्रीतून मिळालेले २५ लाख रुपये आपला मोठा भाऊ शंकर मस्के याला हात उसने दिले होते.
मात्र, जेव्हा गायत्री यांनी ही रक्कम परत मागितली आणि वडिलांच्या जमिनीच्या हिशाची मागणी केली, तेव्हापासून शंकरच्या मनात सूडाची आग धुमसत होती. 'दिलेले पैसे विसरा आणि जमिनीवरचा हक्क सोडा' ही धमकी शेवटी रक्ताच्या खेळात रूपांतरित झाली.
या घटनेनंतर परिसरात प्रचंड खळबळ उडाली आहे. फिर्यादी दिलीप विश्वनाथ चांदोरे राहणार कर्नाटक यांनी सोलापूर तालुका पोलीस ठाण्यात दाखल केलेल्या फिर्यादवरून पोलिसांनी तातडीने चक्र फिरवत या प्रकरणातील सहा आरोपींपैकी पाच जणांना बेड्या ठोकल्या आहेत. अटक करण्यात आलेल्यांमध्ये राणी शंकर मस्के, दीक्षा मस्के, धीरज मस्के, सूरज मोरे आणि सचिन वाघमारे यांचा समावेश आहे.तर पोलीस आता मुख्य आरोपी शंकर मस्केच्या शोधात असून, या हत्येत वापरलेली शस्त्रे आणि नियोजनाचा पुढील तपास करत आहेत. एकाच कुटुंबातील तीन पिढ्यांचा असा अंत झाल्याने बोरामणी गावावर शोककळा पसरली आहे.
0 Comments