सोलापुरात निसर्गाचा कोप: वादळी वाऱ्यात पत्र्याचे शेड अंगावर कोसळून १२ वर्षीय बालकाचा मृत्यू

सोलापूर - उत्तर सोलापूर तालुक्यातील तळे हिप्परग येथे रविवारी निसर्गाच्या कोपाने एका हसत-खेळत असलेल्या कुटुंबाचे जगच उद्ध्वस्त केले आहे. रविवारी दुपारी आलेल्या अचानक वादळी वाऱ्याने एका १२ वर्षांच्या निरागस बालकाचा बळी घेतला. फरहान असलम कल्याणी असे या चिमुकल्याचे नाव असून, त्याच्या जाण्याने संपूर्ण गाव शोकाकुल झाले आहे.रवि

रविवारी दुपारची वेळ. बाहेर वादळी वाऱ्यासह पावसाचा जोर वाढला होता. कल्याणी कुटुंब आपल्या घरात सुरक्षित असल्याची भावना मनात ठेवून बसले होते. आई-वडील आणि लहान बहीण एका बाजूला, तर १२ वर्षांचा फरहान दुसऱ्या बाजूला खेळत होता. पाचवीत शिकणारा हा उमलते फूल, घराचा एकुलता एक आधार होता. मात्र, नियतीला काही वेगळेच मान्य होते.साडेचार ते पावणे पाचच्या सुमारास वाऱ्याचा वेग इतका प्रचंड झाला की, घरावरील पत्र्याचे शेड पत्त्यांच्या बंगल्यासारखे उडून गेले. या शेडसोबत असलेले जड लोखंडी अँगल थेट खाली बसलेल्या फरहानच्या डोक्यावर कोसळले. क्षणात होत्याचे नव्हते झाले. डोळ्यांदेखत घडलेल्या या हृदयद्रावक घटनेने आई-वडिलांच्या काळजाचा तुकडा क्षणात हिरावला गेला. हा घाव इतका वर्मी होता की, फरहानने जागीच प्राण सोडले.

सुदैवाने घरातील इतर सदस्य या दुर्घटनेतून बचावले, पण डोळ्यादेखत आपल्या लाडक्या मुलाचा अंत होताना पाहून पालकांच्या आक्रोशाने आसमंत हादरला. "आमचा एकुलता एक लेक... तो आता परत येणार नाही," हे वास्तव पचवणे त्या आई-वडिलांच्या नशिबी आले आहे.परिसरात सध्या शांतता असून, गावकऱ्यांच्या डोळ्यांतही अश्रू आहेत. एका लहानशा मुलाचा असा झालेला मृत्यू संपूर्ण सोलापूर जिल्ह्याला चटका लावून जाणारा आहे. या घटनेने कल्याणी कुटुंबावर दुःखाचा डोंगर कोसळला असून, त्यांना आता सावरणे कठीण झाले आहे. निसर्गाच्या या क्रूर खेळामुळे एका घराचा दिवा कायमचा विझला आहे.